Declaración de intenciones
Somos fíes de la pesadilla de la posmodernidá, de los gurús del fin de la hestoria, del fin de la llucha de clases, d'ún futuru albidráu de felicidá y prosperidá, de l'estensión de la “llibertá duradera”.
La realidá foi bien distinto y bien medranoso. Nosotres nun viemos morrer na cama al Dictador, nun “abarrotemos” les cais para afitar la democracia nin la Constitución (¿o quiciabes nun yera por eso?), nun mos tocó trabayar n'Ensidesa nin na minería, pero viemos y vivimos la crudeza del sistema capitalista nesti “primer mundu”.
Nacimos nuna tierra castigada como ye Asturies. Pa nosotres el fenómenu de la crisis nun ye tan nuevu o nun tien por que selo, pues vivimos nella dende'l nuestru nacimientu. Contemplemos les consecuencies de les reconversiones industriales y asistimos al complexu procesu de disllocación de toa una era y una concepción de les rellaciones llaborales y del mundu'l trabayu; polo que mos tocó vivir na folla de la precariedá, de la insolidaridá, de la multiplicidá de subcontrataciones, trabayos en negro, hores estres, falta de vacaciones, despidos xabaces ya incapacidá munches veces de llanta-y cara a too ello.
Viemos al movimientu obreru asturianu, al empar que al de buena parte'l mundu, batise en retirada énte un procesu global , de xuru , cola derrota asegurada. Pasemos de l'Asturies lexendario de la mina y la dinamita a l'Asturies de la prexubilación, el clientelismu, el narcotráficu, los centros comerciales y la desmovilización.
Asistimos (y seguimos asistiendo) a la disllocación de la clas obrera. Acabó'l tiempu de les grandes fábriques y de los miles d'emplegaos más homoxéneos de cara a la resistencia. Güei ye una suerte que les más de les compañeres que tenemos al llau tean identificaes con nosotres, pues de xuru perteneza a otra empresa, tenga otru contratu, otros intereses o mos vea direutamente como a una enemiga.
Esti procesu d'atomización foi contestáu n'estremaos graos na década de los 90 y debería seguir siendo un oxetivu pa nós, intentando reaxuntar al proletariáu, non yá a traviés d'un llamamientu a la “reindustrialización” nin coses pol estilu sinon construyendo na cai una comunidá d'intereses y complicidaes ente toes aquelles interesaes en poner fin a toa esta pesadilla de capitalismu xabaz, mediocridá y basura.
Contemplemos el fracasu de les vanguardies de distintos pelaxes destinaes a salvamos, de los llímites y miseries del sindicalismu, “amariellu” o “radical”. En dambos casos, nun se supo tar a l'altura o nun se pudo.
Nun ye tiempu de vanguardies dirixentes. Nun tamos interesaes en “guíar” a naide nin ser les dirixentes de nengún movimientu. Decíen fai bastante tiempu que la emancipación de los trabayaores tien de ser obra de los trabayaores mesmos. Sentímonos parte del común de la masa de les primíes y maltrataes na cotidianidá del xabaz “racionalismu” capitalista. El cambiu social tien de ser coleutivu y a un nivel horizontal.
Y ye por ello polo que decidimos organizamos nestos díes inciertos. Nel gran esfuerzu necesariu pa'l fin de la sociedá de clases (tovía vixente si los árboles nun mos impiden ver la viesca), del trabayu asalariáu y de la mercancía y, en consecuencia, pol establecimientu d'una sociedá comunista d'iguales, sentimonos inspiraes polos estremaos movimientos que trabayaron nesa direición dende fai bien de tiempu.
Sentimonos herederes del marxismu más consecuente, de la I Internacional, del primer sindicalismu revolucionariu, de los movimientos llibertarios, de les que s'organizaron en soviets y en conseyos de fábrica en Rusia, de la Alianza Obrera asturiana, de tola esperiencia conseyista, del situacionismu, de l'autonomía obrera y, en definitivo, de toles persones que trabayaron nel camín la emancipación per enriba de dixebres estériles ya interesaes y de les miseries de les vanguardies polítiques y del sindicalismu.
Entendemos que'l camín ye l'autoorganización de toes aquelles interesaes na llucha escontra'l capital y escontra l'Estáu, dende los sos distintos frentes. Nun llamamos a “organizase” significando organizase con nosotres. Llamamos a un intentu pol que les propies afectaes solucionen los sos propios problemes, xera na que'n cualquier casu intentaremos echar un gabitu, como nun podía ser d'otra manera. Recapitulando, tamos pola autoorganización, a nivel propiu y de les estremaes lluches, pol asamblearismu, la horizontalidá, l'aición directa.
Cansaes del proselitismu reinante en too'l espectru de la “izquierda radical”, nun tratamos de trayer xente a nengún tenderete nin de dir cola nuestra pegadiella o bandera a nengún sitiu. La solmena poles nuestres idees nun tien que ser proselitismu; les lluches tien de ser autónomes y esta autonomía tien de ser respetada.
Lluchamos pol fin del sistema capitalista y toles formes d'autoridá y, pa ello:
-
Lluchamos pola recomposición del proletariáu sobre la base de l'autonomía, de la xuntanza de lluches y, en definitivo, de la superación de les torgues impuestes pol orde afitáu na llucha pol so esbarrumbu.
-
Lluchamos pola creación d'espacios lliberaos dientro d'esti sistema, pa lo cual apoyamos firmemente el movimientu d'ocupación y la so estensión.
-
Lluchamos pol valtu de las cárceles, símbolu de la inxusticia que crea'l propiu sistema, abarrotaes de preses sociales y polítiques, pero non de banqueres, esplotadores nin responsables de la guerra sucia.
-
Lluchamos por un mundu nel que podamos vivir, que'l capitalismu llévase per delantre nel so afán de llucru, polo que tamos escontra'l desarrollismu xabaz.
-
Lluchamos pol fin de la sociedá patriarcal y de la esplotación de la muyer a tolos niveles.
-
Lluchamos pola pervivencia y mantenimientu de la cultura popular y, en primer llugar, de la nuestra cultura asturiana, asina como pola recuperación de la memoria hestórico de la clas obrera mundial na so llucha por la emancipación.
Por tolo espuesto, llamamos a la construcción de trincheres de resistencia al orde dominante y al combate decidíu pola abolición del Estáu y del Capital.
