Comunicáu del FUSOA
Énte la situación de la crisis capitalista y les sus consecuencies
Tán vendiéndonos una crisis cayía del cielu y ensin responsables: cuando se fala de la burbuxa inmobiliaria naide nun fala del arriquecimientu desmidíu que unos cuantos ficieron a costa d’engañar a munchos y munches trabayadores, vendiéndo-yos pisos al doble del su valor real. Nun se fala tampoco de les macro obres públiques, la mayoría ensin sintíu, que dexaron millones d’euros de beneficios a les empreses del formigón. Nun se fala, en definitiva, de qu’equí unos cuantos se llucraron, metieron la mán na caxa y falsearon toles cuentes de los Bancos y Caxes.
Los empresarios del formigón y el ladriellu y los banqueros robaron, y nun hai nin un sólu responsable, nin uno sólu d’éstos lladrones de guante blancu pasó pela cárcel nin va pasar. Esos esfuercios que nos desixen agora pa salir d’esta crisis que montaron nun son, poro, lexítimos. Agora pásennos la factura de los sus excesos: tenemos que dicir que yá valió, y entamar a da-yos onde-yos duel, a facer pequeños actos cotidianos de desobediencia civil-económica, dexar de pagar los impuestos que podamos, les hipoteques, socializar productos de les grandes superficies, puentear la lluz y l’agua… y crear redes de solidaridá de clas que nos ayuden a paliar la represión y a salir d’esta crisis del sistema. Ye´l momentu de pasar a la ofensiva anticapitalista y entamar de cero na construcción, na midía en que ca ún pueda, d’una nueva sociedá al marxen d’esti podre sistema.
No concreto ya inmediato nun podemos dexar que se desanicien más puestos de trabayu.
Énte conflictos actuales como los de Chupa Chups, Venturo XXI, Pizzería La Competencia, y munchos más que vendrán, tenemos que tomar partíu y organizanos. Estos conflictos nun afecten sólo a los y les trabayadores de les distintes empreses: ca puestu de trabayu que se pierde aféctanos tamién a otros y otres trabayadores, y poro nun podemos quedar paraos y paraes. Dende’l FUSOA llamamos al boicó a la Pizzería La Competencia y a asistir a tolos actos de protesta entamaos polos y les trabayadores mientres nun realmitan a los cuatro despidíos nesta empresa por reclamar los sus derechos llaborales.
En Chupa Chups la solución pasa per dañar la imaxe corporativa de la empresa, llevando a cau un boicó económicu al grupu Perfetti Van Melle (Chupa Chups, Smint, Mentos…) dende yá como midía de presión contra’l pieslle de la factoría que la empresa tiéne n’Asturies. Facemos un llamáu tamién a la solidaridá de les y los compañeros del restu l’Estáu español pa que les máquines expendedores que Chupa Chups tién n’aeropuertos, gasolineres, etc… dexen de furrular. Dende’l FUSOA tamién llanzaremos una campaña dirixía a tolos y les kioskeres d’Asturies pa que se xunan tamién a esti boicó al grupu Perfetti Van Melle, pa que dichu boicó económicu a la empresa seya mayor que los beneficios qu’algamaríen desllocalizando la fábrica d’Asturies. Sólo pasando a la resistencia activa podemos vencer y llograr que Chupa Chups siga faciéndose n’Asturies.
Los trabayadores de Venturo XXI lleven un mes y mediu encerraos nel ayuntamientu de Samartín, en Sotrondio, pa protestar pol pieslle de la empresa y el despidu de tola plantilla (73 persones). Lo más grave ye que la empresa tién una participacion de casi el cincuenta por cientu de l’alministración asturiana, y los caradures colos que s’asociaron (los hermanos Coronado) recibieron millones d'euros de sovenciones y fondos mineros, aparte de les instalaciones del pozu Venturo d’Hunosa, en La Güeria de Carrocera, totalmente reformaes a preciu de ganga. Creóse como exemplu de la reconversión de les cuenques de la minería a les nueves tecnoloxíes y los fartones del PSOE y del SOMA nun dexaben pasar la ocasión pa dir a fotografiase cola "ayalga de la corona" tres arrasar les cuenques, dexándoles como una llaceria, ensin futuru pa la mocedá.
Dende equí facemos un llamáu a la solidaridá con estos trabayadores y desiximos al gobiernu asturianu que nacionalice Venturo XXI, una empresa rentable y con contratos de trabayu pendientes, coles perres de les sovenciones qu’arramplaron los hermanos Coronado y que naide nun sabe ónde tán.
Consideramos responsables de la situación al Conseyeru d' industria Graciano Torre y a Víctor González Marroquín, director del Idepa. Llamamos a les solidaries pa qu’espardan esta información y participen nos actos de sofitu a los y les trabayadores y escontra los accionistes públicos de Venturo XXI, (Sadim, Sociedad Regional de Promoción y SODECO) y el propiu gobiernu asturianu.
Facemos un llamáu, por último, a los y les trabayadores de Chupa Chups y Venturo XXI pa dici-yos que la su solución pasa per okupar les sus fábriques y autoxestionales, montando amás una caxa de resistencia que-yos ayude a continuar la llucha hasta la victoria.
La solución a los vuesos problemes llaborales nun llegará de manes de los políticos…
Nun queremos cerrar esti comunicáu ensin solidarizanos colos y les trabayadores de Metro de Madrid, n’especial colos de Solidaridá Obrera, que tantes vegaes se solidarizaron con nós. Acúsenlos d’insolidarios y pronto lo faerán de ser terroristes, pero nós conocemos bien la su solidaridá. Esta xente tuvo na mani de solidaridá con Fer en Xixón, mandaron perres pa la su campaña, tuvieron presentes na concentración na Audiencia Nacional en Madrí cuando xulgaron a Fer y, enantes, tuvieron mostrando tamién el su sofitu pa colos trabayadores de Duro Felguera, Naval Xixón y tantos otros casos polos que s’interesaron. Nun nos van engañar, sabemos bien quién y cómo son los y les trabayadores de Metro, xente solidario y lluchador. Un exemplu de llucha pa les y los obreros de tol Estáu. La su llucha nun por ye un 5%, ye pola dignidá.
LA ÚNICA LLUCHA QUE SE PIERDE YE LA QUE NUN S’ENTAMA
VENCEREMOS COLA SOLIDARIDÀ OBRERA
